Ku wa ,7 Mutarama 2026, EAR Diyoseze Kigeme, binyuze mu mushinga wayo wo kurwanya imirire mibi n’igwingira mu bana, yatanze inka 4 z’umukamo ku miryango 4 yo mu Murenge wa Tare, mu Karere ka Nyamagabe, muri gahunda ya Girinka Munyarwanda. Iyi miryango iri muri gahunda yo kwikura mu bukene ku buryo burambye, hagamijwe kuyifasha kubona amata, ifumbire n’amikoro yo kwihaza mu biribwa no guteza imbere imibereho yabo.
Iki gikorwa kiri mu murongo wa gahunda ya #GiraWigire, igamije gufasha abaturage kwigira no kwihaza, cyane cyane mu guhangana n’ikibazo cy’imirire mibi n’igwingira mu bana. Mu kurushao kwita kuri aba bana ahafashwe n’indwara zikomoka ku mirire mibi bahawe uburyo bw’ubuvuzi bwihuse.
Umunyamabanga Nshingwabikorwa w’umurenge wa Tare, Madame AYINKAMIYE Donatha wari uhagarariye inzego ubuyobozi bw’akarere yashimiye itorero Anglican Diyoseze Kigeme mu gufasha abaturage kurwanya imirire mibi no kwihaza mu biribwa binyuze mu gushyigikira imiryango iri muri gahunda yo kwikura mu bukene ku buryo burambye. Yasoje asaba abaturage borojwe inka na Diyoseze muri gahunda ya Girinka kuzitaho zikororoka bakoroza n’abandi kandi zikabakura mu bukene.
Mu rwego rwo kurushaho kurwanya imirire mibi binyujijwe mu gikoni cy’ibigo nderabuzima, abana bagaragayeho ibimenyetso by’imirire mibi n’igwingira bahabwa indyo nyunganira mirire, irimo amagi, igikoma cya Sosoma n’indagara, bigamije kubafasha gusubirana ubuzima bwiza, kongera ibiro n’imbaraga, no gukura neza.
Uretse gutanga inka, EAR Diyoseze Kigeme yashyize mu bikorwa ibikorwa byinshi by’iterambere mu mirenge yose 17 igize Akarere ka Nyamagabe. Muri byo harimo kubaka no gutera imboga ku turima tw’igikoni 340, koroza ingurube 340, no gutera ibiti by’imbuto ziribwa 35,110. Imiryango 7,962 itishoboye, yashyigikiwe mu kubarihira ubwisungane mu kwivuza (MUSA), hagamijwe kubafasha kugera ku mibereho myiza irambye kandi bagakomeza gukangurirwa isuku no gutegura indyo yuzuye ku bana bari munsi y’imyaka itanu.
Byongeye kandi, hakozwe ibirundo by’ifumbire 340, bifasha kongera umusaruro w’ubuhinzi, guteza imbere ubuhinzi burambye no kwihaza mu biribwa ku miryango yitabiriye uyu mushinga.
EAR Diyoseze Kigeme ikomeje gukorana bya hafi n’inzego z’ibanze n’abafatanyabikorwa batandukanye mu guteza imbere imibereho y’abaturage, ikaba yiyemeje gukomeza gushyira imbaraga mu mishinga igamije kurwanya imirire mibi n’igwingira, no kubaka umuryango utekanye, ufite ubuzima bwiza kandi witeguye iterambere rirambye
